महाज्योती टॅब नोंदणी: जेईई, नीट, एमएचटी-सीईटी परीक्षांसाठी मोफत टॅबचा लाभ!!

राज्यातील हजारो विद्यार्थ्यांना शिक्षणाच्या संधी उपलब्ध करून देण्यासाठी महाज्योती संस्थेमार्फत विशेष योजना राबविण्यात येत आहे. जेईई, नीट आणि एमएचटी-सीईटी (Mahajyoti Tab Registration: Free Tabs for JEE, NEET, and MHT-CET Preparation!!) परीक्षांसाठी मोफत मार्गदर्शनासह विद्यार्थ्यांना टॅब आणि सिमकार्ड पुरवले जात आहे. यंदाच्या शैक्षणिक वर्षात राज्यभरातील ७,००० विद्यार्थ्यांची निवड करण्यात आली असून, जिल्ह्यातील ५४५ विद्यार्थ्यांना टॅब वितरित करण्यात आले आहेत.

टॅब आणि इंटरनेट सुविधेचा लाभ
महात्मा ज्योतिबा फुले संशोधन व प्रशिक्षण संस्था (महाज्योती) ही स्पर्धा परीक्षांसाठी तसेच विज्ञान शाखेतील अकरावीच्या विद्यार्थ्यांना जेईई, नीट, एमएचटी-सीईटीसाठी मोफत प्रशिक्षण देत आहे. हे प्रशिक्षण पूर्णतः ऑनलाइन असल्याने विद्यार्थ्यांना अभ्यासासाठी संस्थेच्या वतीने टॅब आणि सिमकार्ड उपलब्ध करून देण्यात आले आहे. टॅबमध्ये एमडीएम (Mobile Device Management) प्रणाली बसवण्यात आली असून, त्यामुळे याचा उपयोग केवळ शिक्षणासाठीच करता येईल.

महाज्योती योजनेचे ठळक मुद्दे
दररोज ६ जीबी डेटाचा लाभ
संपूर्ण राज्यभर ७,००० विद्यार्थ्यांना मदत
जिल्ह्यातील ५४५ विद्यार्थ्यांना मोफत टॅबचे वितरण
जेईई, नीट, एमएचटी-सीईटीसाठी विशेष प्रशिक्षण उपलब्ध

टॅब वितरणाची प्रक्रिया
योजनेसाठी पात्र ठरलेल्या विद्यार्थ्यांना टॅब २० फेब्रुवारीपर्यंत मिळविण्याची संधी होती. ज्यांनी या कालावधीत टॅब घेतले नाही, त्यांना योजनेसाठी अपात्र समजले जाईल आणि प्रतीक्षा यादीतील इतर विद्यार्थ्यांची निवड केली जाईल. त्यामुळे भविष्यात या संधीचा लाभ घेऊ इच्छिणाऱ्या विद्यार्थ्यांनी वेळेत अर्ज करणे आवश्यक आहे.

विद्यार्थ्यांसाठी महत्त्वाची सुविधा
महाज्योतीच्या वतीने जेईई, नीट आणि एमएचटी-सीईटी परीक्षांची तयारी करणाऱ्या विद्यार्थ्यांना ऑनलाइन प्रशिक्षण दिले जात आहे. इंटरनेटच्या अडचणी येऊ नयेत म्हणून मोफत टॅब आणि सिमकार्ड पुरवले जात आहे. त्यामुळे ग्रामीण भागातील विद्यार्थ्यांनाही समान संधी मिळत आहे.

“महाज्योतीच्या या उपक्रमामुळे अनेक विद्यार्थ्यांना शैक्षणिक क्षेत्रात संधी मिळणार आहे. त्यांच्या उज्ज्वल भविष्यासाठी आम्ही कटिबद्ध आहोत.”
– सुवर्णा पगार, विभागीय समन्वयक, महाज्योती